და|ბრუ|*ნება





პოეზია

და|ბრუ|*ნება




ქალი ბრუნდება სახლში.
ის ბრუნდება სამსახურიდან, 
მაღაზიიდან,
შეხვედრიდან,
ის ბრუნდება ქალაქიდან,
რომელიც მოიტოვა ზურგს უკან,
და რომელმაც მოიტოვა ზურგს უკან,
ქალი ბრუნდება 
ფერდებგამოგლეჯილი გზის გავლით,
რომლის სისხლიც მუშების ბავშვებს დააპურებს,
თავის მხრივ, მუშასაც მოუწევს მიწისთვის სამაგიეროს დაბრუნება,
რადგან რომ არა ის,
რომ არა მისი მკვრივი და უსწორმასწორო ზედაპირი,
ის იდგებოდა ქალაქის რომელიმე ხიდთან,
უმიზნოდ და ხელებშეკრული
 
ქალი ბრუნდება . თვალს აყოლებს შემოდგომის ცას,
რომელიც ირეკლავს გარეუბნის კორპუსებს,
მეტროს გვირაბს, გარემოვაჭრეების დახლებს,
ქუჩის ძაღლებს,
და ქალს, რომელიც ბრუნდება და საკუთარ თავს აყოლებს თვალს, 
როგორც უცნობს,
 
ქალი ბრუნდება, 
შიშვლდება და წვება წყალში,
და წყალი ირხევა მისი მხრების და მკერდის გასწვრივ,
და წყალი და ქალი ეხვევიან ერთმანეთს როგორც დიდი ხნის უნახავი
შეყვარებულები,
და მუშები ბრუნდებიან სახლებში,
მიწა მოაქვთ თვალებით და იწმენდენ დაღლას,
 
ღამით იღვიძებს მიწა,
როცა მუშები იძინებენ.
როცა ქალის სხეული უწონადობაში გადადის და წყალზე ტივტივებს,
როცა გარეუბნის ყველა ძაღლი წყვეტს ყეფას,
 
მიწა იღვიძებს და იწყებს ხეტიალს,
მარტოობას შერჩენილ გამვლელებს შორის.
 

თანამედროვე ფილოსოფია, ლიტერატურა, ესეისტიკა, სიურრეალისტური გლემი, ჰორორი,პორნოგრაფიული ზღაპრები, პოლიტიკური პროვოკაციები, ძლიერთა ამა ქვეყნისათა შეურაცხყოფა... ასევე კიბერ-კულტურა, ქართული გლ(ი)ამური, ურბანული ფოლკლორი, მედია-კრიტიკა, შავი იუმორი, შოკი და ა.შ.