ენა





პოეზია

ენა




ენა თავსდება ყველგან
სადაც მის მოთავსებას მოინდომებ
ის შეგიძლია სიტყვების ქვეშ ამოდო
ის შეიძლება კრთებოდეს მეტროს ლიანდაგზე
ის შეიძლება გრამატიკაშიც გადაიჭრას
და შეცვალოს მისი სტრუქტურა
მას შეუძლია შეგცვალოს შენც
მას შეუძლია ყურებზე საქარე მინები დაგამაგროს
და ყურებთ დაიწყო ხმების დანახვა
მასთან შეგიძლია მარტო დარჩე
როცა შენი მეგობარი პოეტები
დაპატარავებს და დაქუცმაცებას დაგიწყებენ
და როცა შენს მეგობარ პოეტებს
სიტყვების ნაცვლად, პირიდან მტვერს გადააყრი,
მტვერს, რომელიც მშრალია და როყიო
მტვერი ნერწყვის გარეშე - 
ასე არ იქცევიან ისინი,
ვინც კარგად იცნობენ მიწას
მათ იციან,  სისველე აუცილებელია
მაგრამ შენ ენა მოათავსე ყველგან
სადაც მისი მოთავსება გინდოდა
და პირში ნერწყვი აღარ გიგუბდება
არადა, როგორ გინდოდა
მათთვის ნერწყვში მტვერი ამოგეგლისა
როგორ თაფლი თბილ რძეში
 მიგერთმია და  შექცეოდით მეტაენას
 
* ენა თავსდება ყველგან, 
მან შეიძლება შეგცვალოს შენც
და მთელი შენი ენობრივი სამყარო ამოაბრუნოს
ეს შეუძლია მას,
არ იცოდი
ნუთუ?
როგორ შეიძლება, ამდენ ხანს, ეს მარტივი რამ არ გცოდნოდა?
იქნებ არცოდნას აბრალებ მომხდარს?
 
* ეს მისი პერანგის სუნია
მთელ ქალაქში ვიცნობ ჩემი მეგობრის პერანგის სუნს
ყველა ოფლისგან დამძიმებულ პერანგში გამოვარჩევ 
ეს ნამდვილად მისი პერანგის სუნია
ის სადღაც ახლოს, 
საყვარელ ქალთან ერთად ქარებს მიაპობს
 
*ცხვირზე ხელს ვიჭერ, 
ვხტები გვირაბში
საკანალიზაციო მილში
მაღალი ძაბვის სადენზე
ელექტრო შოკით ვიგრეხ კისერს
 
* მშვიდად ვარ,
ენა თავსდება ყველგან სადაც მის მოთავსებას მოვინდომებ
მას შეუძლია შეცვალოს ჩემი  მგრძნობელობითი სისტემა
მას შეუძლია მართოს, არეგულიროს, მოახდინოს დისტანცირება
მასთან შესაძლოა მარტო დარჩენა,
 მოდუნება
 თავის დაკარგვა
 
ის აკონტროლებს ყველაფერს
 
როგორც სათვალთვალო კამერა
 
როგორც მესამე თვალი
საფრთხეს ათი კილომეტრის რადიუსში გაანდგურებს
და მშვიდად განარძნობს მოთავსებას და განთავსებას
ახალ ენებსა და ხესაწყოებში.
 

თანამედროვე ფილოსოფია, ლიტერატურა, ესეისტიკა, სიურრეალისტური გლემი, ჰორორი,პორნოგრაფიული ზღაპრები, პოლიტიკური პროვოკაციები, ძლიერთა ამა ქვეყნისათა შეურაცხყოფა... ასევე კიბერ-კულტურა, ქართული გლ(ი)ამური, ურბანული ფოლკლორი, მედია-კრიტიკა, შავი იუმორი, შოკი და ა.შ.