მთვარის შუქზე შესაგნები





პოეზია

მთვარის შუქზე შესაგნები




 
ციკლიდან: ვიკიპედიური ღამეები
 
 
1. მერქანი
 
ხე არის მყარი მასალა და გამოიყენება
საწვავად და ნაკეთობების შექმნისთვის.
ხისგან კეთდება ფიცრები,
რომელიც სხვადასხვა საქმიანობისთვის გამოიყენება.
თანამედროვე დროში გადამეტებულად იჭრება ხე,
რაც იწვევს ეკოსისტემების განადგურებას.
ხის მოჭრა შესაძლებელია ნაჯახით,
ხერხით ან ელექტროხერხით.
 
 
2. ოთახი
 
შემოსაზღვრული ადგილი სახლში
ან რაიმე სხვა შენობაში.
ხშირად ოთახს აქვს კარები და ფანჯრები.
ოთახს შეიძლება ჰქონდეს კონკრეტული დანიშნულება.
მაგალითად, ოთახს სადაც საჭმელს ამზადებენ,
ეწოდება სამზარეულო.
 
 
3. გონიერი ადამიანი
 
პრიმატების სახეობა,
ჰომინიდების ჯგუფის,
ადამიანთა მოდგმის წარმომადგენელი.
მან დიდი ზეგავლენა მოახდინა
დედამიწის ბიოსფეროს შექმნაში,
შექმნა დედამიწის საკუთარი გარსი -
ანთროპოსფერო.
ადამიანების ერთობლიობას
ეწოდება პოპულაცია ან კაცობრიობა.
ინდივიდების ურთიერთობა ქმნის
საზოგადოებას ან სოციუმს.
ინფორმაცია, რომელიც ადამიანს
მემკვიდრეობოთი ნიშანთვისების
გზით გადაეცემა,
ცირკულირებს საზოგადოებაში
და წარმოქმნის ნოოსფეროს.
საზოგადოების ყველა მატერიალური
და ინფორმაციული საქმიანობა
წარმოქმნის კულტურას.
ადამიანი,
როგორც ცოცხალ ორგანიზმთა 90%,
იყოფა ორ სქესად:
მამრი და მდედრი.
 
 
4. შავი შაშვი
 
შავი შაშვი მშიშარა,
უხეიროდ მფრინავი ფრთოსანია,
ღია ადგილებს თავს არიდებს
და დროს მეტწილად
ბუჩქნარებში საკვების -
ჭიაყელების,
ლოკოკინების,
მწერების
და კენკრის
ძებნას ანდომებს.
 
 
 
მთვარის შუქზე შესაგნები
 
შვილო, თავზე საყრელი გაქვს მთვარის შუქი,
თავზე საყრელი გაქვს მზის სხივები,
მოიმარჯვე საწერი მოწყობილობა და დაწერე ლექსები!
შვილო, დაწერე ლექსები, თავზე საყრელი გაქვს დედამიწა,
თავზე საყრელი გაქვს სახელმწიფო, მინდორ-ველი,
შენს ხელებშია ასტრონომიული რეალობა,
დროზე მოიმარჯვე საწერი მოწყობილობა
და დაწერე იურიდიული ლექსები, თუ გნებავს,
დაწერე, შვილო, დემოგრაფიული ლექსები
ან გენდერპრობლემები დაამუშავე ლექსებად,
შვილო, თავზე საყრელი გაქვს ელექტროენერგია,
რა თავში იხლი ამ ყველაფერს, თუ ლექსებს არ დაწერ,
დაწერე პოეტური ლექსები, თუ გნებავს,
თავზე საყრელი გაქვს სიყვარული, შვილო,
და მასწავლებლებიც თავზე საყრელი გაქვს,
თავზე საყრელი გაქვს ვაქცინების მრავალფეროვნება
და თანდართული შოკური სავაქცინო პედაგოგიკა,
ზოგჯერ მგოსნებიც კი წერენ ლექსებს, შვილო,
რომ არაფერი ითქვას პოლიტიკოსებზე
და მათი ოჯახის წევრებზე ან პოსტწევრებზე, შვილო,
თავზე საყრელი გაქვს მათი ლექსები,
და მთვარით განათებული მათი თვალებიც
თავზე საყრელი გაქვს, ჰოდა, დაამუშავე ისინი, შვილო,
მგოსნური მონდომებით დაამუშავე ეს და სხვა თემები,
აქეთ ეცი, იქეთ ეცი, იფრინე, ილაღე,
შენ ხომ პოეტად ხარ გაჩენილი, შვილო,
კომპიუტერებიც კი თვალის დაუხამხამებელ ლექსებს წერენ
და ასეთი რეალობით გარემოცულს შენ რა დაგემართა, შვილო,
შვილო, არავინ ახლებს შენს ლექსს თავის ხელ-ფეხს,
თუ საწერ მოწყობილობას მოიმარჯვებ და წერას შეუდგები,
ნუ იორჭოფებ, შვილო, ნუ დაიწუნებ სასარგებლო შეგონებას,
ლექსებს ელის შენგან ეროვნული ცნობიერება,
ლექსებს ელიან შენგან ცნობად სახეთა ცნობიერებანი,
რომლებიც თავზე საყრელი გაქვს, შვილო,
თავზე საყრელი გაქვს წლები, გაივლიან ისინი
და არც შენ შეგრცხვება ცნობად სახედ სუფევა, შვილო,
რათა საჯაროდ მოგვიწოდო, თუ რა არის პოეზია, რა არის პროზა,
როგორი უნდა იყოს მუსიკა, როგორი უნდა იყოს ზოოპარკი,
როგორი უნდა იყოს მხატვრობა, როგორი უნდა იყოს ქანდაკება,
როგორი უნდა იყოს პატრიოტიზმი, პარლამენტი, პარაშუტი,
როგორი უნდა იყოს ჭაობი, როგორი უნდა იყოს ყველაფერი,
ხოლო რათა წინ წახვიდე და უკან საჯაროდ მოიხედო, შვილო,
დაე, თავზე საყრელი ჰქონდეთ შენს მსმენელებს შენი ლექსები,
ისე, როგორც თავზე საყრელი აქვთ შენნაირი ნაირ-ნაირების
შთაგონებით ნახატევი, ნაქანდაკევი, ნამუსიკევი, ნამღერევი,
ნამოთხრობევი, ნარომანევი, ნასტატიევი, ნაინტერვიუევი,
წარმოსახულ მუზეუმში შესანახად ყოველგან ნაქნარი, 
ნაყალბევი, ნაცრუევი, ნაფარისევლევი, ნაარტისტევი,
ნაპათოსევი, ნაგმირევი, ნაპედაგოგევი, ყოველგან ნაქნევი,
თავზე საყრელი ჰქონდეს ამ ტყე-ველს შენი პოეზია,
მტერს ნუ გაახარებ, შვილო, მოყვასი ახარე,
ნუ გადაყრი იმას, რაც თავზე საყრელი გაქვს,
დაე, როცა ათწლეულებს და ოცწლეულებს უკან მოიტოვებ, 
ერთი პატარა კუთხე შენც მოგეპოვებოდეს, დაე,
ამ მარადიული სოფელ-სახელმწიფოს მაიმუნთა მუზეუმში,
დაამუშავე თემები და დუნიაზე კაცი შეიქნები, შვილო,
თავზე საყრელ მთვარეს შენი ლექსები შეაგებე, შვილო!
 
24.05.2021
 
 
 
დებილები
 
ჭკვიანო, პრინციპულო, დამუხტულო, გამარჯვებულო,
შენ ყველაფერი იცი, შენ იცი, რომ მიზეზები გაგაჩნია:
ამ მიტინგისგან ხეირი არ იქნება, არარეიტინგულია,
იმ მიტინგისგან ხეირი იქნება, რეიტინგულია,
ამ მიტინგზე იმ მიზეზით არ მიირბენ,
იმ მიტინგზე ამ მიზეზით არ მიირბენ,
შენ მიზეზები გაგაჩნია, ჭკვიანო ტურისტო,
შენი სიფხიზლე დიადი სიფხიზლეა მარად
და, მაშასადამე, ახლაც, აი, ახლა, როცა, მაგალითად,
დებილია Daniele Ganser, დებილია Wolfgang Wodarg,
დებილია Sucharit Bhakdi, დებილია Clemens Arvay,
დებილია Paul Schreyer, დებილია Herbert Kickl,
დებილია Ken Jebsen, დებილია Dirk Müller,
დებილია Rainer Mausfeld, დებილია Michael Hüter,
დებილია Michael Spitzbart, დებილია Gunnar Kaiser,
დებილია ბევრი, ბევრი, ბევრი სხვაც, ნუ მოუსმენ მათ,
მათ და ბევრ სხვასაც არ აღიარებს აზროვნების ტურიზმი,
ეს არ არის მარგებელი შენი ტვინისთვის,
ეს პრობლემებს ქმნის! შენ ხომ ჭკვიანი ხარ!
აკი, პირველი მაინც შენ იქნები, ვინც მათ ტაშს დაუკრავ,
აზროვნების ტურიზმი  ნიშანს როცა მოგცემს!
აკი, მას მერე, როცა ერთ დროს ნიშანი მოგცა,
შენ კი ყველაფერს ჭკვიანურად და სწორად მიხვდი,
უკვე შენვე გიკრავენ ტაშს მაშინ, როცა შენ ტაშს უკრავ
მარქსს, მარკუზეს, ფუკოს, გი დე ბორს, ბოდრიარს,
ლაკანს, მარკიზ დე სადს, ჰაკიმ ბეის, ჩომსკის,
პლატონოვს, ზამიატინს, ორუელს, აგამბენს,
ათობით და ასობით სხვა მარილს სოფლისა,
რომლებზეც ჯერ წარმოდგენა არ გაქვს,
რაკი ლოკალური მეინსტრიმის ბაზარზე
მათი იმპორტი ჯერ არ განხორციელებულა,
მაგრამ რომლებსაც დროთა განმავლობაში
აუცილებლად მისწვდები და დაამცირებ!
აკი, კარგია მათზე დისერტაციების წერა,
აკი, შენთვისვე მოაქვს სარგებელი ამ საქმეს,
როცა მათზე ყბედობ და ამაში ფულს იღებ
პატიოსნად, ღირსეულად, დამსახურებულად,
რაც, აკი, შენთვისაც  ცნობილია ძალიან კარგად!
აკი, ხაფანგში გაბმულ სტუდენტებსაც უხვად,
დახვეწილი სისასტიკით, უნაწილებ ამ განძს!
შენი გული ასე გალობს, ასე გალობს შენი სიმართლე:
„დღეს ამათი დაცინვისგან ხეირი არ იქნება,
დღეს იმათი დაცინვისგან იქნება ხეირი,
ხვალ იმათი დაცინვისგან ხეირი არ იქნება,
ხვალ ამათი დაცინვისგან იქნება ხეირი“,
რა თქმა უნდა, ჭკვიანი ხარ და პრინციპული,
მე შენ რა უნდა გასწავლო, როცა ეს შენი ბიზნესია:
ყოველთვის გახსოვდეს, ვინ როდის არის დებილი
და ჯერ ვის როდის არ უნდა მოუსმინო
ან მოუსმინო და ისე მოიქცე, ვითომ არ მოგისმენია
და ვითომ სულ არ იცი, სინამდვილეში რა ხდება! :)
 
24.05.2021
 

თანამედროვე ფილოსოფია, ლიტერატურა, ესეისტიკა, სიურრეალისტური გლემი, ჰორორი,პორნოგრაფიული ზღაპრები, პოლიტიკური პროვოკაციები, ძლიერთა ამა ქვეყნისათა შეურაცხყოფა... ასევე კიბერ-კულტურა, ქართული გლ(ი)ამური, ურბანული ფოლკლორი, მედია-კრიტიკა, შავი იუმორი, შოკი და ა.შ.