• პირველი სამამულო წარმოების არტპორტალი
პოეზია

სააღდგომო ეპისტოლე S1_34.89

×
ავტორის გვერდი ლაშა მილორავა 01 იანვარი, 2015 1755

ქრისტე აღდგა! - ისმის ეზოში.

ჭეშმარიტად, - ყვირის მამა აივნიდან.

ქრისტე აღდგა! - ტირის მათხოვარი ეკლესიასთან.

ჭეშმარიტად, - ქუდში ხუთ თეთრიანს აგდებს მამაკაცი ოქროს კბილით.

ქრისტე აღდგა! - გაყინული მზერით აცხადებს პირდაპირ ეთერში დიანა ჯოჯუა.

ჭეშმარიტად, - პირჯვარს იწერს მომაკვდავი მოხუცი ეკრანს მიღმა.

ქრისტე აღდგა! - სანთელს ანთებს მეძავი, მუხლებზე დგება და პირში იღებს.

ჭეშმარიტად, - მალევე ათავებს კლიენტი.

ქრისტე აღდგა! - პრემიერ მინისტრის პოსტი ფეისბუქზე ათ წამში ექვსას ლაიქს აგროვებს.

ჭეშმარიტად, - წერია პირველივე კომენტარად.

ქრისტე აღდგა! - დედა რამდენიმე წუთის წინ დაბადებულ ბავშვს ნიკოლოზს არქმევს.

ჭეშმარიტად, - ბედნიერი მამა შამპანურს ხსნის.

ქრისტე აღდგა! - ,,ყველაფერი ისე იქნება, როგორც შენ გინდა’’.

ჭეშმარიტად, - ,,გშორდები, მორჩა, შემეშვი’’.

ქრისტე აღდგა! - მშრალ ხიდთან გაყინულ ბომჟს ცხვირიდან სისხლი სდის.

ჭეშმარიტად, - სკდება ლამპიონის ნათურა.

ქრისტე აღდგა! - ხელს უჭერს მიკროფონს ილია.

ჭეშმარიტად, - ფეთქდება სამების ტაძარი.

ქრისტე აღდგა! - მესიჯით მილოცავს ,,პეესპე’’.

ჭეშმარიტად, - ვამბობ და თვალებს ვხუჭავ.

ქრისტე აღდგა! ქრისტე აღდგა! ქრისტე აღდგა! - ჩამესმის გუგუნი.

მერე თქვენ რა?! - მეძინება.

ამავე რუბრიკაში
  კვირის პოპულარული