ადამიანები მუშაობენ:
მაუსს კიდებენ ხელს და ისარს მონიტორზე ამოძრავებენ.
ადამიანები მუშაობენ:
ყვავილებს რწყავენ და ზეცაში გალაქტიკებს აკვირდებიან.
ადამიანები მუშაობენ:
ბანკებში სხედან, ფულს ითვლიან და ჩეკებს წერენ.
ადამიანები მუშაობენ:
არაყს სვამენ და ქაბაბს ჭამენ.
ადამიანები მუშაობენ:
ერთიმეორე მოჰყავთ მეორე ნახევრად და ბავშვებს აჩენენ...
ადამიანები დაიღალნენ:
მაუსს კიდებენ ხელს და კვდებიან.
ადამიანები დაიღალნენ:
ვეღარ რწყავენ ყვავილებს და ბაღებიც ხმება.
ადამიანები დაიღალნენ:
ბანკებში სხედან და პეშვიდან სცვივათ გროშები.
ადამიანები დაიღალნენ:
არაყს სვამენ ციროზის ნიშნით.
ადამიანები დაიღალნენ:
ერთიმეორე მოჰყავთ მეორე ნახევრად და ბავშვს ვერ აჩენენ...
ადამიანები მუშაობენ და დაიღალნენ:
დაბადებიდან სიყვარულზე და
მეგობრობაზე მოქაქანე
ძველისძველი თუ ახალთახალი ადამიანები
პატიოსანი მუშაობით გადაიღალნენ
და ყვავილს რწყავენ,
არაყს სვამენ,
მაუსს კიდებენ
სიკვდილის წინ
დაქანცულ ხელს და
ყვირიან, რომ:
მუდამ შრომობდნენ!
